Аялгууг Б.Шарав
ХАЙРХАН УУЛЫН БАРАА
Сэвшээ хонгор салхиараа илбээд
Сэвлэг даахийг минь сэврээн торниулсан
Сэврүү шиг холдоо санаашран суухад
Сэтгэл дотор минь тодорхой байдаг
Хайрхан уулын барааг
Харах л бүрий минь жаргал юм аа
Хайртай буурал аав, ээждээ
Очих бүр минь заяа юм даа.
Нутаг усаа шүтэж явахын
Нууцхан хайрыг өвгөдөөсөө өвлөсөн
Нуурын шувууд шиг ганганаад морддог ч
Нулимстай нүдэнд минь илхэн байдаг
Хайрхан уулын барааг
Харах л бүрий минь жаргал юм аа
Хайртай буурал аав, ээждээ
Очих бүр минь заяа юм даа.
Дэвэн нисдэг жигүүртэн нь хүртэл
Дэнж нууранд нь өнжин хоргоддог
Дэргэдийн нөхөр нэрийг нь хэлэхэд
Дээж айргийнх нь үнэр сэнгэнэсэн
Хайрхан уулын барааг
Харах л бүрий минь жаргал юм аа
Хайртай буурал аав, ээждээ
Очих бүр минь заяа юм даа.
No comments:
Post a Comment