Ээлээ минь

ЭЭЛЭЭ МИНЬ

Өвлийн амралтын дараа шинэ хичээл эхэллээ. Оюутнуудаар би амралтаараа юу хийсэн тухай зохион бичлэг бичүүлэв. Чадан ядан л бичиж байна. Заримд нь үг хэл нь байвч сэтгэж сийрүүлдэг санаа нь алга, заримд нь санаа оноо нь байвч бичиж найруулдаг үг нь алга, хөөрхий.  Олон оюутан шинэ жилээр өвөө, эмээгээсээ авсан бэлэг хамгийн том нь байсан гэж бичиж. Хүүхдүүд л юм болохоор багашаархан юманд баярлаа биз гэж бодлоо. Юу өгч авдаг юм бэ дээ тэгээд гэвэл мөнгө гэлээ. Хэдийг өгөх үү гэсэн чинь гучаас тавин мянган йэн гэнэ. Их мөнгө. Тавин мянган йэн гэдэг бол манай мөнгөөр бол найман зуун мянган төгрөг. Ач, зээдээ гар татдаггүй хаа газрын хөгшчүүлийн сэтгэл сайхан. Харин эмээ, өвөө чинь тэгээд нас сүүдэр хэдтэй юм бэ гэтэл толгойгоо бариж, шилээ маажлаа. Эмээ, өвөөгийнхөө насыг мэдэхгүй ээлээ минь, ээлээ минь. Хэдийг ч өгөөд хэрэг алга даа, зайлуул.

01.20.2010